Matokeo ya Darasa la Saba 2026 (PSLE): jinsi ya kuangalia na maana ya gredi
NECTA imetangaza matokeo ya PSLE 2026 na ufaulu umefika asilimia 85.22. Hapa ni jinsi ya kuangalia matokeo ya mtoto, gredi A hadi E zinamaanisha nini, na kwa nini Darasa la Saba halina daraja wala pointi.

Baraza la Mitihani la Tanzania (NECTA) lilitangaza matokeo ya Mtihani wa Kumaliza Elimu ya Msingi (PSLE) 2026 Jumanne, tarehe 3 Novemba 2026. Mtihani ulifanyika tarehe 9 na 10 Septemba 2026.
PSLE ni mtihani wa kuchagua wanafunzi wa kujiunga na Kidato cha Kwanza. Kila mwanafunzi anapata cheti, awe amechaguliwa au hajachaguliwa.
Jinsi ya kuangalia matokeo ya Darasa la Saba 2026
- 01Kwenye ShuleXtra. Fungua ukurasa wa matokeo, chagua Darasa la Saba, mwaka 2026, kisha andika jina la shule au namba ya mtahiniwa. Unapata matokeo ya mtoto na ya shule nzima, pamoja na takwimu za shule.
- 02Kwenye website ya NECTA. NECTA pia huweka matokeo rasmi kwenye website yao, necta.go.tz.
- 03Kwa SMS. Piga *152*00#, chagua 8 ELIMU, kisha 2 NECTA, na ufuate maelekezo. Hii ndiyo njia ambayo NECTA wenyewe wameiweka kwenye website yao.
Angalia matokeo ya Darasa la Saba 2026
Unajiandaa kwa Darasa la Saba ijayo? ShuleXtra Resources ina past papers za Darasa la Saba za miaka mingi, kila moja na majibu yake, bure. Ukikwama kwenye swali, muulize PixelBOT, AI assistant ya ShuleXtra: anajibu kutoka kwenye past papers hizo hizo.
Past papers za Darasa la Saba na majibuMuulize PixelBOTMatokeo ya Darasa la Saba ya miaka yote
Takwimu za kitaifa, PSLE 2026
| Kipengele | Idadi |
|---|---|
| Waliosajiliwa | 1,168,718 (wasichana 637,214, wavulana 531,504) |
| Waliofanya mtihani | 1,139,318 (asilimia 97.48) |
| Hawakufanya | 29,400 |
| Waliofaulu (A, B, C) | 970,876 |
| Ufaulu | Asilimia 85.22 (2025: 81.80) |
| Gredi A na B pamoja | 429,667 (asilimia 37.72) |
| Ufaulu wa wavulana | Asilimia 86.18 |
| Ufaulu wa wasichana | Asilimia 84.43 |
Matokeo ya watahiniwa 31 yalifutwa: 26 kwa udanganyifu na 5 kwa kuandika lugha ya matusi. Watahiniwa 371 waliokuwa wagonjwa wakati wa mtihani wamezuiliwa matokeo na wataruhusiwa kufanya mtihani mwaka 2027. Kwenye kurasa za NECTA wanaonekana na alama *R.

Gredi za PSLE zinamaanisha nini
Masomo ni sita: Kiswahili, English, Hisabati, Sayansi na Teknolojia, Maarifa ya Jamii na Stadi za Kazi, na Uraia na Maadili. Kila somo lina alama 50, na gredi yake ni hivi:
| Gredi | Alama (kati ya 50) | Maelezo ya NECTA |
|---|---|---|
| A | 41-50 | Excellent |
| B | 31-40 | Very good |
| C | 21-30 | Good |
| D | 11-20 | Satisfactory |
| E | 0-10 | Fail |
Kufaulu ni gredi A, B au C. Mwanafunzi pia anapata wastani wa gredi (Average Grade) wa A hadi E kwa masomo yote. Kwenye ukurasa wa shule, wastani wa shule unaandikwa kwa jumla ya alama 300 (masomo sita mara alama 50).
PSLE haina daraja (division) wala pointi. Tovuti ikikuonyesha "Division" au "aggregate" ya Darasa la Saba, hiyo si ya NECTA.
Wastani wa gredi kitaifa
NECTA ilitangaza ufaulu kwa ujumla bila kugawa kila gredi. Tulihesabu kurasa zote 20,010 za shule, na wastani wa gredi wa watahiniwa 1,139,272 wenye matokeo uko hivi:
| Gredi | Watahiniwa |
|---|---|
| A | 79,250 |
| B | 350,417 |
| C | 541,208 |
| D | 151,563 |
| E | 16,834 |
Alama za nyota (*) kwenye matokeo
Wakati mwingine badala ya gredi utaona alama hizi. Maana yake, kwa mujibu wa NECTA:
| Alama | Maana |
|---|---|
| X | Hakufanya somo hilo, ingawa alisajiliwa. |
| ABS | Hakufanya mtihani. |
| *E | Matokeo yamezuiliwa hadi athibitishe kulipa ada ya mtihani. |
| *S | Matokeo yamesimamishwa hadi taarifa zake zifafanuliwe, au kituo hakikutimiza masharti ya usajili. |
| *W | Matokeo yamezuiliwa au kufutwa kwa kuthibitika kuhusika na udanganyifu. |
| *I / I | Alama za maendeleo (CA) hazikuwasilishwa kwa masomo yote, au kwa baadhi ya masomo. |
| *R | Atarudia (Repeat). Mwaka huu ni wale 371 waliozuiliwa matokeo kwa sababu ya ugonjwa. |
Ukiona tatizo kwenye matokeo
Kama jina, namba au somo haliko sawa, anza na shule ya mtoto. Mkuu wa shule ndiye anayewasiliana na NECTA kuhusu taarifa za mtahiniwa. NECTA pia imetoa namba za huduma kwa wateja: 0738 743 381 na 026 261 0690.
Matokeo unayoyaona ShuleXtra ni ya Baraza la Mitihani la Tanzania (NECTA), na tumehakiki kila shule dhidi ya jumla zake. Ukiona tofauti yoyote, matokeo rasmi ya NECTA ndiyo sahihi.
Kwa shule
Shule zinazotumia ShuleXtra zinaweka mitihani ya ndani kwa gredi zile zile za NECTA, ili mwalimu, mzazi na mwanafunzi waone mapema kama mtoto yuko njia sahihi kabla ya mtihani wa taifa.