Matokeo ya Kidato cha Nne 2025 (CSEE): jinsi ya kuangalia na kuelewa daraja lako
Ufaulu wa Kidato cha Nne 2025 ni asilimia 94.98. Jinsi ya kuangalia matokeo, gredi na pointi za kila somo, na jinsi masomo saba bora yanavyokupa daraja la I hadi 0.

NECTA ilitangaza matokeo ya Mtihani wa Kidato cha Nne (CSEE) 2025 Jumamosi, tarehe 31 Januari 2026. Mtihani ulianza tarehe 17 Novemba 2025. NECTA huyaita matokeo kwa mwaka ambao mtihani ulifanyika, ndiyo maana ni "CSEE 2025" ingawa yalitoka 2026.
CSEE inapima kile mwanafunzi alichojifunza kwa miaka minne ya sekondari, na inaonyesha nani anaweza kuendelea Kidato cha Tano au kujiunga na vyuo.
Jinsi ya kuangalia matokeo ya Kidato cha Nne 2025
- 01Kwenye ShuleXtra. Fungua ukurasa wa matokeo, chagua Kidato cha Nne, mwaka 2025, kisha andika jina la shule au namba ya mtahiniwa. Unapata matokeo ya mtoto na ya shule nzima, pamoja na takwimu za shule.
- 02Kwenye website ya NECTA. NECTA pia huweka matokeo rasmi kwenye website yao, necta.go.tz.
- 03Kwa SMS. Piga *152*00#, chagua 8 ELIMU, kisha 2 NECTA, na ufuate maelekezo. Hii ndiyo njia ambayo NECTA wenyewe wameiweka kwenye website yao.
Angalia matokeo ya Kidato cha Nne 2025
Unajiandaa kwa Kidato cha Nne ijayo? ShuleXtra Resources ina past papers za Kidato cha Nne za miaka mingi, kila moja na majibu yake, bure. Ukikwama kwenye swali, muulize PixelBOT, AI assistant ya ShuleXtra: anajibu kutoka kwenye past papers hizo hizo.
Past papers za Kidato cha Nne na majibuMuulize PixelBOTMatokeo ya Kidato cha Nne ya miaka yote
Takwimu za kitaifa, CSEE 2025
| Kipengele | Idadi |
|---|---|
| Watahiniwa wa shule waliosajiliwa | 569,914 |
| Watahiniwa binafsi | 25,927 katika vituo 813 |
| Waliofanya mtihani | 555,606 (asilimia 97.5) |
| Waliofaulu (Daraja I hadi IV) | 526,620 |
| Ufaulu | Asilimia 94.98 (2024: 92.37, 2023: 89.36) |
| Daraja la Kwanza | 56,413 (asilimia 10.17) |
| Daraja I hadi III | 255,404 (asilimia 46.06) |
| Daraja la Nne | 271,216 (asilimia 48.92) |
| Daraja 0 | 27,838 (asilimia 5.02) |
Matokeo ya watahiniwa 79 yalifutwa kwa udanganyifu, na 435 waliokuwa wagonjwa wameruhusiwa kufanya mtihani mwaka 2026.

Gredi na pointi za kila somo
| Gredi | Alama | Maelezo ya NECTA | Pointi |
|---|---|---|---|
| A | 75-100 | Excellent | 1 |
| B | 65-74 | Very good | 2 |
| C | 45-64 | Good | 3 |
| D | 30-44 | Satisfactory | 4 |
| F | 0-29 | Fail | 5 |
Jinsi daraja linavyopatikana
NECTA inachukua masomo saba yenye gredi bora, inajumlisha pointi zake, na jumla hiyo (AGGT kwenye ukurasa) inakupa daraja. Somo lenye X, yaani hukulifanya, halihesabiwi kwenye masomo saba bora.
| Daraja | Pointi (masomo 7 bora) |
|---|---|
| I | 7-17 |
| II | 18-21 |
| III | 22-25 |
| IV | 26-33 |
| 0 | 34-35 |
NECTA haichapishi jedwali hili kwenye kurasa za matokeo. Tulilipata kwa kukagua pointi na daraja la kila mtahiniwa kwenye kurasa za NECTA, na kila mtahiniwa anaangukia humo isipokuwa wanane waliokosa somo moja, ambao walipata Daraja la Tatu ingawa pointi zao zilikuwa chini ya 22.
Mfano: A mbili, B mbili na C tatu ni pointi 2 + 4 + 9 = 15, yaani Daraja la Kwanza.
Madaraja kwa kuhesabu kurasa zote za shule
NECTA haikutangaza Daraja la Pili na la Tatu peke yake. Kwa kuhesabu kurasa zote za shule, watahiniwa 555,424 wa shule wenye daraja wako hivi:
| Daraja | Watahiniwa |
|---|---|
| I | 56,512 |
| II | 85,230 |
| III | 114,251 |
| IV | 271,578 |
| 0 | 27,853 |
Tofauti ndogo kati ya hesabu hii na ile iliyotangazwa (kwa mfano Daraja la Kwanza 56,413) ni ya muda: tangazo na kurasa za shule viliandaliwa nyakati tofauti. Kurasa ndizo watahiniwa wanazoziona.
Alama za nyota (*) kwenye matokeo
Wakati mwingine badala ya gredi utaona alama hizi. Maana yake, kwa mujibu wa NECTA:
| Alama | Maana |
|---|---|
| X | Hakufanya somo hilo, ingawa alisajiliwa. |
| ABS | Hakufanya mtihani. |
| *E | Matokeo yamezuiliwa hadi athibitishe kulipa ada ya mtihani. |
| *S | Matokeo yamesimamishwa hadi taarifa zake zifafanuliwe, au kituo hakikutimiza masharti ya usajili. |
| *W | Matokeo yamezuiliwa au kufutwa kwa kuthibitika kuhusika na udanganyifu. |
| *I / I | Alama za maendeleo (CA) hazikuwasilishwa kwa masomo yote, au kwa baadhi ya masomo. |
Ukiona tatizo kwenye matokeo
Kama jina, namba au somo haliko sawa, anza na shule ya mtoto. Mkuu wa shule ndiye anayewasiliana na NECTA kuhusu taarifa za mtahiniwa. NECTA pia imetoa namba za huduma kwa wateja: 0738 743 381 na 026 261 0690.
Matokeo unayoyaona ShuleXtra ni ya Baraza la Mitihani la Tanzania (NECTA), na tumehakiki kila shule dhidi ya jumla zake. Ukiona tofauti yoyote, matokeo rasmi ya NECTA ndiyo sahihi.