Matokeo ya Kidato cha Pili 2025 (FTNA): jinsi ya kuangalia na maana ya REFERRED
Wanafunzi 811,575 walifanya upimaji wa Kidato cha Pili 2025. Jinsi ya kuangalia matokeo, jinsi daraja linavyopatikana, na REFERRED kwenye matokeo inamaanisha nini.

NECTA ilitangaza matokeo ya Upimaji wa Kitaifa wa Kidato cha Pili (FTNA) 2025 tarehe 10 Januari 2026, jijini Dar es Salaam, siku moja na matokeo ya Darasa la Nne.
FTNA ni upimaji wa kufuatilia maendeleo ya mwanafunzi, ili walimu, wazazi na wanafunzi wajue wapi pa kuongeza juhudi. Ni muhimu pia kwa sababu kufaulu FTNA (au Qualifying Test) ni sharti la kufanya Kidato cha Nne.
Jinsi ya kuangalia matokeo ya Kidato cha Pili 2025
- 01Kwenye ShuleXtra. Fungua ukurasa wa matokeo, chagua Kidato cha Pili, mwaka 2025, kisha andika jina la shule au namba ya mtahiniwa. Unapata matokeo ya mtoto na ya shule nzima, pamoja na takwimu za shule.
- 02Kwenye website ya NECTA. NECTA pia huweka matokeo rasmi kwenye website yao, necta.go.tz.
- 03Kwa SMS. Piga *152*00#, chagua 8 ELIMU, kisha 2 NECTA, na ufuate maelekezo. Hii ndiyo njia ambayo NECTA wenyewe wameiweka kwenye website yao.
Angalia matokeo ya Kidato cha Pili 2025
Unajiandaa kwa Kidato cha Pili ijayo? ShuleXtra Resources ina past papers za Kidato cha Pili za miaka mingi, kila moja na majibu yake, bure. Ukikwama kwenye swali, muulize PixelBOT, AI assistant ya ShuleXtra: anajibu kutoka kwenye past papers hizo hizo.
Past papers za Kidato cha Pili na majibuMuulize PixelBOTMatokeo ya Kidato cha Pili ya miaka yote
Takwimu za kitaifa, FTNA 2025
| Kipengele | Idadi |
|---|---|
| Waliosajiliwa | 898,718 (wasichana 497,891, wavulana 400,827) |
| Waliofanya upimaji | 811,575 (asilimia 91.26) katika shule 6,223 |
| Hawakufanya | 77,689 |
| Daraja I hadi III | 240,469 (2024: 239,707) |
| Ufaulu | Umepanda kwa asilimia 1.52 kutoka 85.41 mwaka 2024 |
Matokeo ya wanafunzi 29 yalifutwa kwa udanganyifu na 11 kwa kuandika lugha ya matusi.

Gredi na daraja
FTNA inatumia gredi na pointi zile zile za Kidato cha Nne:
| Gredi | Alama | Pointi |
|---|---|---|
| A | 75-100 | 1 |
| B | 65-74 | 2 |
| C | 45-64 | 3 |
| D | 30-44 | 4 |
| F | 0-29 | 5 |
Daraja linatokana na jumla ya pointi za masomo saba bora: Daraja I ni pointi 7-17, II ni 18-21, III ni 22-25, IV ni 26-33, na 0 ni 34-35. Jedwali hili halichapishwi na NECTA; tumelipata kwa kukagua pointi za watahiniwa kwenye kurasa za NECTA.
REFERRED inamaanisha nini
Kwenye matokeo ya FTNA, mwanafunzi wa Daraja 0 haandikiwi "0". Kwenye safu ya daraja anaandikiwa REFERRED, na kwenye takwimu za shule anahesabiwa chini ya DIV 0. Maana yake ni kwamba hakufikia kiwango cha kufaulu upimaji huu.
Hatua inayofuata kwa mwanafunzi wa REFERRED inategemea taratibu za shule na za Wizara, kwa hiyo zungumza na shule ya mtoto mapema.
Madaraja kwa kuhesabu kurasa zote za shule
| Daraja | Wanafunzi wa shule |
|---|---|
| I | 78,349 |
| II | 61,411 |
| III | 100,875 |
| IV | 464,795 |
| 0 (REFERRED) | 106,021 |
Kwa hesabu hii, ufaulu wa Kidato cha Pili 2025 ni asilimia 86.93, sawa na 85.41 ya mwaka 2024 ukiongeza 1.52 iliyotangazwa.
Mtaala ulioboreshwa
Mwaka 2025 Kidato cha Pili walipimwa kwa mitaala miwili: mtaala wa zamani, na kwa mara ya kwanza mkondo wa amali wa mtaala ulioboreshwa. Kwa mujibu wa NECTA, mwaka 2026 Kidato cha Pili watapimwa kwa mtaala ulioboreshwa.
Ukiona tatizo kwenye matokeo
Kama jina, namba au somo haliko sawa, anza na shule ya mtoto. Mkuu wa shule ndiye anayewasiliana na NECTA kuhusu taarifa za mtahiniwa. NECTA pia imetoa namba za huduma kwa wateja: 0738 743 381 na 026 261 0690.
Matokeo unayoyaona ShuleXtra ni ya Baraza la Mitihani la Tanzania (NECTA), na tumehakiki kila shule dhidi ya jumla zake. Ukiona tofauti yoyote, matokeo rasmi ya NECTA ndiyo sahihi.